El PNV yá nun quier a Aralar nu Gobiernu alavés

Sede de la Deputación Foral d'Álava (Vitoria)

El deputáu xeneral d’Álava, el demócrata-cristianu Xabier Agirre, destituyóu al únicu miembru del sou gabinete perteneciente a Aralar, el cabezaleiru de Mocedá ya Aniciu Social, Xabier Aspuru. Aquesti abstúvose na votación de los presupuestos ensin aportare razón denguna pa la sua decisión. Agirre pidíu-ye que demitiera, a lo qu’Aspuru se negóu, polo que foi destituyíu del sou cargu nu intre.
La decisión d’Aralar d’abstenese nos presupuestos forales tomóuse d’un die pa outro, foi adoztada pola direición del partíu ya yera escuñecida pol PNV. Aquestos cuidan que la decisión ta venceyada col pautu alcordáu ente PNV ya PSE-EE pa sacare alantre los presupuestos nas deputaciones forales.
Pola sua parte’l vicecoordinador xeneral d’Aralar, Jon Abril, acusóu al PNV de “deslealtá absoluta” hacia la sua formación, ya espricóu que tres el pautu ente PNV ya PSE-EE los demócrata-cristianos nun cuntoron con Aralar p’aniciare unos presupuestos que-yes abultan curtios ya pouco progresistas na tema fiscal.

Apecháu’l II Seminariu Internacional sobro Antisemitismu

Sinagoga de Córdoba, aniciada nu sieglu XIV

Ún de los prencipales desenguedeyos puesto enriba la mesa tres duas xeiras, foi que’l feichu d’inxitare al pueblu hebréu vien “del perxuiciu ya la descuñecencia de la cultura xudiga”. Asina rematóu’l Seminariu cellebráu en Madrí, que barrunta al tiempu un sonce aumentu del refugu a los fiyos d’Israel.
L’alderique, amás de vieyu, yía compricáu, ya esixe bien de precisión: “hay que dexare espaciu a una crítica al Gobiernu d’Israel ensin trespasare la llinia roxa”, mentóu Ana Salomón, embaxadora en misión especial pa las Rellaciones cola Comunidá ya Organizaciones xudigas. D’igualmiente Alejandro Baer, profesor na Nuversidá Complutense de Madrí, cuida que “yía fundamental cernire ente la crítica política ya la información antisemita”.
El caleyu sirvíu tamién p’aniciare’l primer Observatorio d’Antisemitismu d’España, allabanciáu pol presidente del Movimiento escontra la Intolerancia, Esteban Ibarra. La estitución será la canal qu’asoleyará los actos de refugu a los xudigos, ya ñaz col obxetu d’espertare la concencia social en cuantas a los eventos de carácter antisemita n’España. Afita tamién una ponte más pa la llucha escontra la intolerancia de cualesquier tipu.

Telefónica va postiase n’Alemaña

Sede de Telefónica, na Gran Vía de Madrí

La compañía, que ya taba asitiada nu mercáu móvil de la federación centro-europeya a traviés d’O2, baltará tamién eillí nu del accesu a la rede por ADSL. Eillo foi tres mercare Hansenet, la cuarta operadora de banda ancha alemana, a Telecom Italia.
Hansenet va costa-ye a Telefónica nuevecientos millones d’euros tres un alcuerdu cola compañía italiana, na que la operadora presidida por César Alierta tien una partecipación del 7%, qu’avagóu más d’un añu en robrase. Al tiempu quedará añubrida la deuda de Hansenet, fincada en 659 millones d’euros, ya que taba cobierta por empréstamos de Telecom Italia.
Telefónica sumará asina 2,2 millones de clientes de banda ancha a los quince que-ye aporta O2 ya inxerirá los 2300 emplegaos de Hansenet, qu’ufrez banda ancha fixa ya móvil baxo la marca Alice. Por mor del altu grau de recuñecencia d’aquesta, Telefónica va mantenela enceso nos dous años vinientes, onque escurque la inxerte darréu n’O2.

Los intelectuales yá nun son gustantes con Zapatero

Círculu de Bellas Artes, cai Alcalá (Madrí)

Intelectuales dalgunos, namás artistas outros, el casu foi que’l mundu de la cultura arimáu a la esquierda s’axuntóu nu Círculo de Bellas Artes de Madrí p’asoleyare un manifiestu que quier aguyare al gobiernu del PSOE pa qu’escamude la política que desenvuelve porque nun-yes gusta un nadín.
Taban deillos de los que nas outras campañas electorales sofitoron a Zapatero con antusiasmu, como Miguel Ríos, quien ensin mal aquel dixo que “güei nun-ye votarié”, ya los que enxamás tuvioron al llau del presidente del gobiernu. Toos eillos esíxen-ye políticas “progresistas”, sobro tou pa facere frente a la crisis, cuidando entoncias, que las que se desenrollan anguaño nun lo son.

El testu, nu que fegura’l pegollu de Sabina, Serrat, Vitor Manuel, Aute, Pilar Bardem, Juan Diego Botto, Juan José Millás ou Almudena Grandes, ya entituláu “Outra política ya outros valores pa salire de la crisis”, vindica, ente outras cousas, “reformas fiscales que garanticen la equidá, la facendera fiscal, ensin paraísos nin previlexos pa millonarios”.