El segundu intercalare

La Xunión Internacional de Telecomunicaciones (UIT) atrasióu hasta 2015 la decisión sobru se mantién ou non el segundu intercalare ou segundu adicional. El segundu intercalare yía una estayina de tiempu que s’añede cada poucos años pa mantenere la houra sincronizada cola rotación de la Tierra.

La houra solare, que vien dada pola rotación de la Tierra sobru’l sou eixe ya la sua órbita alredore del sol, val pa medire’l tiempu, peru aquesta rotación muda por mor de la velocidá ya d’eventos cumu terremotos ou volcanes. Poru, yía necesariu añedire un segundu a los reloxes atómicos.

EEXX propón eliminare’l segundu intercalare pa que nun haiga errores nos sistemas de GPS ya pa que nun seya necesariu axustare los sistemas informáticos ya de telecomunicación. Pola sua parte, Reinu Xuníu, Canadá ou China nun son gustantes con esfaese del segundu adicional.

El gobiernu escocés puxa por axebrase

Parlamentu de Holyrood (Edimburgu)

El menistru cimeiru d’Escocia ya llider del Partíu Nacional Escocés (SNP), Alex Salmond, anuncióu que n’outoñu de 2014 los escoceses podrán votare pola independencia del país del Reinu Xuníu. La entruga na papeleta será nidia: “¿Yía usté gustante cola indepedencia d’Escocia?”.

Onque’l resultáu se tercie pal lláu de los independentistas, el procesu d’axebra nun será automáticu, senón que’l gobiernu escocés tendrá asina’l mandáu de los ciudadanos p’apautare la independencia col parlamentu británicu de Westminster.

Alex Salmond acetóu’l pidimentu de Llondres de que la entruga seya clara, peru mantién la fecha d’outoñu de 2014, cuandu’l premer menistru británicu querié que fora enantias. Tamién propón que s’entrugue a la xente se refuga ou non qu’Escocia tea más competencias ya quier que voten los mayores de deciséis años.

Afallaos dous pranetas semeyaos a la Tierra

Na contorna d’una estrella paecida al Sol, Kepler-20, unos astrónomos atoponun dous pequeños pranetas: ún yía dalgu mayore que la Tierra ya l’outru un pouquín más pequeñu. Los centíficos nun son quienes a velos direutamente, peru cuentan que podrién sere rocosos. Naquesa mesma estrella detectáranse ya outros trés pranetas más.

L’observatoriu espacial Kepler, de la NASA, nun vei los pranetas. Lu que fai yía amirare estrellas de las que berruntan que tienen sistemas pranetarios. N’eillos identifica cuerpos n’órbita cuandu ún d’eillos se crucia por delantre del astru na llinia de visión dende la Tierra, eigual qu’asocede nun eclise.

Los dóus pranetas chámanse Kepler 20-e ya Kepler 20-f, tienen radios de 1,03 ya 0,87 veces el de la Tierra ya dan una vuelta completa a la estrella Kepler 20 en 6,1 ya 19,6 dies (el praneta de nuesu fáilu en 365), ensegún espricóu Francois Fressin, del Harvard Smithsonian Center for Astrophysics.

Sony anicia ellectricidá con papel

La compañía xaponesa tien diseñáu una batería qu’anicia ellectricidá con papel. La batería usa una enzima que torna’l papel en glucosa. Aquesta, amestada con osíxenu ya outras enzimas, anicia iones d’hidróxenu ya ellectrones que xeneran ellectricidá.

Anguañu la nueva batería namás yía quien a facere furrulare aparatos muy simpres, peru nu futuru, servirá pa cargare dispositivos móviles, cumu teléfanos móviles ou PCs portátiles. Na sua apresentación na feria xaponesa Eco-Products, la remestura de cachos de papel con augua ya enzimas facié furrulare un pequeñu ventiladore.

Croacia chega a la XE

Croacia firmóu'l tratáu d'inxertadura que lu tornará, de magar el 1 de santamarina de 2013, nu 28ª estáu de la Xunión Europea, siendu'l segundu de los Balcanes, tres Esllovenia. Los croatas tienen agora qu'acetare la decisión mediante un referéndum que, ensegún los sondeos, será sofitáu pol 52% de la probración.

Los cimeiros llíderes políticos son gustantes con enxerise nu sistema monetariu européu, lu que podrié asocedere p'hacia l'añu 2020. El premer menistru, el social-demócrata Zoran Milanovc mentóu que "vamos amestanos a la XE dafeichu", onque entovía falta la ratificación de cada estáu de la Xunión.

Un robot camín de Marte

El robot d'esploración Curiosity foi llanzáu con un cohete Atlas V dende Florida, empobináu al cráter Gale del planeta marcianu. El direutor de la NASA, Charles Bolden, amosóu'l sou antusiasmu pa cola misión, chamada Mars Science Laboratory (MSL), que servirá p'atropare datos mientres se trabaya nuna misión tripulada a Marte.

Curiosity yía un vehículu tou-terrenu que yía quién a aballase pola superficie del planeta vecín, ya supón el cuartu enviáu pola axencia espacial norteamericana a Marte. El premeiru foi'l Sojourner, de la misión Mars Pathfinder, ya'l postreiru, l'Opportunity, entovía furrula nu suelu marcianu.

El robot enviáu va enxeríu nuna cápsula de 4,5 metros de diámetru amestada al módulu de viaxe. La sonda tien por delantre 570 millones de kilómetros, nun viaxe de 255 dies nu que tendrá que facere seis maniobras d'axuste de la trayeutoria, trés durante'l viaxe ya las outras trés p'averase a Marte.

Afalláu un llagu nuna lluna de Xúpiter

Los astrónomos pescúdanse, cuantayá, porquéi la superficie xelada d'Europa, una de las llunas de Xúpiter, tien un cientu d'escachaduras, que s'acolluman dende l'espaciu. Los estudios feichos na Tierra amuesan que la rachadura del xelu apruz pola presencia d'augua caliente subterránea.

Agora los centíficos atoponun una gran cantidá d'augua llíquida umbaxu la superficie xelada d'Europa. L'analís feichu siñala que yía augua caliente, lu que supón espiculare cola posebilidá de que'l llagu abellugue vida orgánica. Los resultaos pubricónunse en Nature ya fonun asoleyaos pola NASA en rueda de prensa.

Seis meses de Galileo

Va yá seis meses que la Xunión Europea pusu n’órbita los dous primeiros satélites de la riestra de trenta qu’aniciarán la costelación del sistema Galileo, que quier apurrire un serviciu de navegación por satélite de llibre acesu. El proyeutu européu apolizóuse en 2003 ya escomenciará a furrulare en 2014, pa tare operativu dafeichu en 2019. El determín d’Europa yía dixebrase del GPS norteamericanu ya aniciare un impautu económicu de 90.000 millones d’euros nos vinientes vente años.
Las autoridades europeas nun s’aventian tantu al falare del costu del proyeutu, qu’al entamu diba sere de 3.400 millones ya tendrá enxeríos 5.400 pa 2020. Ta planificada una malla de 30 satélites (27 encesos ya trés de reserva), más avanzada que los venticuatru de GPS, onque aquesti va ameyorare pa 2014, xustu cuandu Galileo emprincipie a aportare servicios.
Tampoucu nun falan de los servicios melitares qu’aportará’l sistema européu. Namás mientan que nun habrá dependencia en política esteriore ya de segurancia, ya que los servicios de defensa, cumu asocede col GPS, nun trancarán los usos ceviles. Outramiente, dambos sistemas serán compatibles ya furrularán colos mesmos receztores, ensegún un alcuerdu robráu en 2004.

Un Citroën con xeitu

El tercer modelu de la riestra de coches con más xeitu de la marca francesa cheva nu mercáu deillas selmanas ya yía’l de más valumbu de la clas DS. El sou valir escomiencia en trenta mil euros ya asítiase na estaya de las berlinas de familia más curiosas, cumu’l Passat ou l’A4. El DS5 será’l cabeiru de la ringuileira n’Europa, ya que pa los mercaos asiáticos habrá un modelu DS6, desenvueltu en China ya gustante colos vezos orientales.

La llinia remestura’l xeitu coupé col break ya por dientru semeya l’aspeutu d’un avión, con dalgunos controles allugaos nu teichu ya outros ente’l conductor ya’l pasaxeiru. L’interiore complétase con materiales de primer calidá. Umbaxu’l capot agachúpanse dous motores de gasolina de 155 ya 200 cv ya trés diésel de 114, 133 ya 158. A eillos súmase’l ñomáu HYbrid4, qu’amesta un motore diésel con ún lléutricu: el primeiru yía un HDi de 160 cv mientras el segundu aporta 40 cv, dambos derixíos por una unidá de xestión.

Entovía queda más Asterix

Albert Uderzo, debuxante francés qu’aniciaba las aventuras d’Asterix ya Obelix xunta’l guionista René Goscinny, mentóu que los galos tendrán nuevas abadías, tres atopare relevu pa escribire la hestoria ya debuxala.
Los harmanos Frédéric ya Thierry Mébarki continuarán el llabor de debuxu, ya Jean-Yves Ferri’l de los guiones. Uderzo diz que ya ta “un poucu cansu” ya que los años “pasonun”. Amás cunta que decidíu “dexare aquestu a autores más mozos, abondu intelixentes pa facelu”, cola fin de que los presonaxes continúen vivos.
Uderzo, que tien yá 84 años, siguíu escribiendo la hestoria tres la muerte de Goscinny en 1977. Los 33 títulos de los afamaos galos tienen vendíu 350 millones de llibros (en más de cien llinguas) ya sirvionun pa rodare once películas, dende qu’en 1959 asoleyara por primer vez el puebru bretón d’Asterix.

Apolízase una vacuna escontra’l VIH

La melecina yía segura pa los voluntarios ya anicia una potente respuesta inmunitaria, pasandu asina la primer fas, la qu’endica que nun yía perxudicial. El llabor cola MVA-B (virus MVA con cuatro xenes del sotipu B del VIH) escomencióula l’investigador Mariano Esteban, del CSIC, ya la sua apricación en voluntarios llevóuse a cabu n’hospitales de Madrí ya Barcelona.
Lu qu’afala a los investigadores a siguir col trabayu yía que la nueva melecina yía quien a aniciare defensas, qu’apaeciorun nu 95 % de los 24 voluntarios, asoleyando los resultaos en “Journal of Virology Vaccine”.
Entovía deben continuare los ensayos en voluntarios sanos ya quiérse probar se la respuesta inmune qu’anicia la vacuna yía abonda pa que las presonas con VIH puedan acoutare la infición ensin tomar las melecinas a diariu. Eillu supón ensayare la vacuna non pa prevenire senón cumu tratamientu.

El grupu R.E.M desapártase

La banda estaoxunidense diou anuncia de la sua dixebra tres más de trés décadas de carrera. Ensegún el comunicáu qu’engarabitorun na web, “cadagún cueye un camín con una gran sensación de gratitú ya de pasmu por tolu que fomos quien a facere”.
Tamién espresan “el nuesu más fondu agradecimientu por escuchanos” a tolos qu’en dalguna ocasión “se sintiorun apalpaos pola nuesa música”. Pola sua parte, el cantante Michael Stipe, mienta que cuandu ún va a una fiesta hai que sabere cuándu “yía houra de marchare”.
El cuartetu, que completan el guitarrista Peter Buck, el baxista Mike Mills ya’l batería Bill Berry, salíu a escena en 1981 con Radio Free Europe, axuntandu elementos de post-punk, pop ya música llariega norteamericana.

Alemaña pon fin al serviciu melitar

El Parlamentu federal alemán (Bundestag) aprobóu la fin del serviciu melitar obrigatoriu en tiempos de paz. El grupu que sofita al gobiernu, la CDU, encontaos polos Verdes, foi gustante col exércitu profesional de voluntarios, dexando atrás el reclutamientu a la fuercia tres 55 años nas Fuercias Armadas xermanas.
La nueva medida amenorgará'l númaru d'efectivos melitares a 185000 soldaos ya dirá arimada a la desapaición de la emprestación social sostitutoria, el chamáu zivi, que dexará a hospitales ya outros servicios púbricos ensin l'axuda de los oxetores de concencia.

AT&T mercóu T-Mobile

El grupu de telecomunicaciones AT&T, el segundu operador de telefonía móvil d'Estaos Xuníos, pagóu 27500 millones d'euros pa facese col control de T-Mobile, la filial norteamericana de móviles de Deutsche Telekom, anguañu la cuarta operadora na federación. Los conseyos de dambas robras forun gustantes cola operación.
Con aquesta operación AT&T quier postiare la súa rede p'agambare l'emburrie de Verizon Wireless, la premeira compañía de la estaya de los operadores móviles, ya que ta partecipada nun 50% por Vodafone. D'aquestamiente, Deutsche Telekom recibirá'l 8% del capital d'AT&T ya tendrá un puestu nu Conseyu d'Alministración de la compañía estauxunidense.
Mentantu, el nuevu grupu aspera enantare en más de 8000 millones las inversiones n'infraestructuras nos vinientes siete años. Son cuñecíos los problemas d'AT&T na rede de sou, con cayidas nas chamadas ya una velocidá de tresmisión de datos menor que la de los sous rivales.

L’atención al cliente tará apolizada por llei

El Conseyu de Menistros foi gustante col anteproyeutu de llei de Servicios d'Atención al Cliente, qu'obrigará a las empresas qu'apurren servicios d'interés xeneral (augua, lluz, teléfanu, seguros, tresportes, etc.) a tenere teléfanos d'atención al cliente gratuitos, atendíos por presonal formáu ya durante l'horariu en qu'apurren el serviciu.
Anguañu los teléfanos d'atención gratuitos son el 15% del total ya nun yía fácil atopare'l númaru al que chamare, poru, la llei obrigará a las empresas a informare por escritu del sou teléfanu d'atención. La nueva llei tamién afalará que l'atención seya presonal, allindándose a un menutu l'emplegu de contestadores.
El Gobiernu tampoucu nun quier que s'allonguen las asperas, ya los carpíos ya pidimentos tendrán que recibire respuesta nun mes cumu másimu. Al tiempu, las empresas deberán afitare mecanismos pa que quede costancia de las queixas ya podere facere un siguimientu d'eillas.

Estrasburgu aveira’l crucifixu

El Trebunal Europeyu de Dreichos Humanos cuida que las cruces nun violan el dreichu de los pas a educare a sous fiyos ensegún las súas convicciones. La sentencia yía inapelable ya da la razón a la Presidencia del Gobiernu italianu, qu'aprisentara en xineiru de 2010 un recursu escontra l'amparu de Soile Lautsi.
Soile Lautsi canióu en 2001 a la escuela onde estudiaban sous fiyos que retirara los crucifixos porque la súa presencia diba a la escontra de la llibertá relixosa. La direición de la escuela negóuse sofitada pol Menisteriu d'Educación ya Soile apresintóu un recursu ante un trebunal alministrativu de Vénetu.
La demanda foi refugada en 2005 yá que los xueces cuntorun que'l crucifixu yera un símbolu de la cultura ya hestoria italianas. El recursu de la muyer italiana al Conseyu d'Estáu touvu'l mesmu resultáu, asina que Soile Lautsi foi al Trebunal de Dreichos Humanos d'Estrasburgu qu'en 2009 ye-dióu la razon, enantias del recursu del Gobiernu italianu de 2010.

Febra óptica obrigatoria

El Gobiernu asoleyóu'l reglamentu d'Infraestructuras Comunes de Telecomunicaciones nu que s'inxer que los nuevos edificios que s'anicien tean febra óptica ya cable coaxial, a mayores del par de cobre, cola fin de qu'haiga velocidades d'accesu superiores a los 100 Mbps.
Aquesti xeitu d'infraestructuras venceyan l'aniciu ya istalación nos edificios de llugares empobinaos a abellugare equipamientos de telecomunicaciones, canalizaciones ya outros elementos necesarios pa los cableaos interiores. Hasta eillos chegarán las redes espurridas polos operadores.
Aquesta infraestructura tien por fin apurrire a los ciudadanos el dreichu a accedere a cualisquier operador de telecomunicaciones qu'empreste serviciu, afitando la competencia ente eillos. Industria diz qu'eillu yía fondeiru pal desenvolvimientu social ya económicu del estáu, amás d'aportare actividá económica ya emplegu.